Lannen 1967 ti komans avek en latmosfer leksitasyon pour eleksyon zeneral ki baze lo Sifraz Iniversel ek en Konsey Lezislativ pli demokratik. Parey ‘The People’ ti pas son komanter dan son premye edisyon lannen date le 2 Zanvye 1967:
“An 1967 Sesel ti temwanny bann eleksyon pli signifikan. Non selman, sak adilt pou annan drwa vote, me eleksyon sa lannen pou anmenn pli gro batay politik dan listwar Sesel, ant de parti politik.
Parti Demokratik in komans rod sipor moral avek son polisi entegrasyon – e deza propriyete bann gran kare later pe komans donn larzan SDP, e sa parti pe anpes SPUP ganny okenn sipor finansyel . Tousala i vedir ki batay in komanse e sa lager pe promet pour enn ki pou dir…”
Le 4 Fevriye 1967 Msye Rene ti adres lepep Seselwa lo Radyo Sesel, lanfaz ti ganny mete lo serten laspe lalit SPUP:
“Nou merit okip nou bann dimoun aze. Nou merit pran swen avek bann ki pa kapab travay. Nou merit donn fasilite lantrennman bann zenn ki kit lekol. Nou merit ankouraz bann peser pour tyonbo plis pwason e donn en fasilite ‘cold store’ ki pou ed Seselwa aste pwason ki ganny lapes.
Nou merit asire ki tou bann later i ganny devlope byen e ed bann pti propriyeter later finansyerman, oswa devlop zot later. Nou merit donn fasilite bann fermye pour zot vann zot prodwi”.
An Mars ti komansman mwan kot ti en peryod difisil pour bann travayer anploye par Departman Travay Piblik. Akoz move planing, larzan pour serten proze ti pe fini, e de douzenn travayer ti pe ganny notis pour ale.
Dan zournal ‘The People’, SPUP ti demann gouvernman pour les bann travayer dan Gouvernman debout pour eleksyon si zot anvi. “Dan en pti pei parey Sesel ti pour meyer si travayer gouvernman enkli bann ansennyan ti kapab pran konze san lapey pour debout dan eleksyon…”
Prensip SPUP se ki eleksyon i konsern tou dimoun. Sa ti osi ankor en lapel ek gouvernman pour donn sak Seselwa laliberte pour zwe zot rol dan lavi politik sak pei. Le 12 Mars, kanpanny eleksyon ti lanse pandan en miting piblik lo Gordon Square. Parmi bann size ki Msye Rene ti koz lo la ti ledikasyon. Ekstre dan zournal Parti:
“Ledikasyon lo nivo primer merit lib pour sak zanfan. Napa okenn rezon akoz zanfan ki ganny admet kolez oswa kouvan merit peye tandis ki bann ki dan bann lekol primer dan bann parwas pa peye.
Admisyon dan Kolez oswa Kouvan i merit ouver pour tou bann etidyan ki viv dan vwazinaz. Sa zafer donn diferan liv diferan lekol merit arête. Sa i sel fason pour donn en sans bann zanfan ki sorti dan fanmir ki mizer e ki pa kapab al kolez oswa kouvan ganny en bon ledikasyon primer…”
Le 7 Avril 1967, Gouverner Angle ki ti baze Sesel, ti pran son retret. Nouvo Gouverner, Sir H.S. Norman Walker, ti arive en semenn plitar le 15 Avril.
Tandis ki SPUP ti kontinyen avek son kanpanny pour ofer tou zanfan Seselwa en meyer sans ledikasyon pour tou, pour retir sa sistenm klas ki ti anplas. SPUP atraver son portparol ‘The People’ ti dir ki pa normal ki lamazorite zenes Seselwa ti pe viv en lavi kot zot in ganny kondannen pour reste parey zot ete san okenn ledikasyon dan zot lavi. Sistenm ledikasyon ti konsantre plis lo en pti minorite ki zot paran ti annan larzan e fer ekspre pour kondann larestan zenn ki ti pli gran mazorite zenes Seselwa.
Plis zanfan ti lekol pour selman wit an, sis dan primer e zis dezan dan ‘junior’ segonder. A laz 15 an zot ti’n fini konplet zot ledikasyon. Sa bann zenn ti swa travay dir a en tre zenn az pour ede okip zot fanmir, e serten ti tonm dan bandisite e prostitisyon.
