Sete dan en lanbyans detant ki bann aktivis Brans Parti Lepep Bel Air ti zwenn dan en foronm dan Sant Kominoter Bel Air Mardi le 4 Zen 2013. Parmi ti annan bann mobilizater, sekreter seksyon, reprezantan Lig Madanm, Lazenes ek Veteran.
Tyermenn Brans Bel Air, madanm Nichole Barbe ek Manm Komite Santral pour Bel Air, msye Vincent Meriton ti osi prezan.
Dan son diskour lentrodiksyon, madanm Barbe ti demann bann militan pour kontinyen travay dir pour anmenn sa meyer Bel Air ki Parti Lepep ti promet pandan kanpanny eleksyon. Swivan sa ti annan en prezantasyon par msye Robert George lo kontinyite dan bann polisi parti tou dilon son tranzisyon sorti SPUP anpasan par SPPF pour vin Parti Lepep.
Msye Meriton ti fer remarke ki se gras a travay dir bann ki’n la avan nou ki parti in konsolid son pozisyon e ozordi i nou devwar pour kontiny sa travay.
Apre sa ti annan prezantasyon kart manm pour bann aktivis swivi par rafresisman dan en latmosfer lafet vi ki son landmen ti Lazournen Liberasyon. Bann aktivis ti zwenn ankor Merkredi le 5 Zen apre seremoni depoz kouronn kot Moniman Zonm Lib pou kontinyen fete.
