Pandan sesyon Lasanble Nasyonal Mardi, Manm elekte pour Beau Vallon, Mirena Souris, ti demann gouvernman pour revwar polisi konsernan dimoun aze ki ganny plase dan bann rezidans pour dimoun aze.
Onorab Souris ti fer sa demann, ki ti ganny sipor Lasanble, atraver en mosyon ki i ti soumet pour diskisyon. I ti anvi ki polisi i ganny revwar pour anpes labi. Bokou Manm ki ti entervenir pa ti serten ki ti annan en polisi kler akoz serten kriter pour dimoun aze ganny en landrwa dan rezidans pa ti pe ganny swiv.
“Merit sa mosyon i kler, se pour fer sir sa ki merite i ganny loportinite pour ganny en plas dan rezidans pour dimoun aze e osi dan konteks laplikasyon prensip legalite e loportinite,” Onorab Souris ti dir.
Onorab Murielle Marie, reprezantan Au Cap, ti segonn mosyon e propoze ki gouvernman i reviz bann kriter ki deza anplas; ki en zanfan i devret pran swen avek son paran koman son devwar; e dan ka kot i annan rezon sosyal fodre ki i annan en rapor detaye pour konplemant laplikasyon.
Sa ki ti osi resorti dan deba ti sizesyon ki sekter prive i travay avek gouvernman pour konstrir bann rezidans pour dimoun aze dan bann distrik oubyen bann sant rezyonnal.
Sitiasyon aktyel pe montre, bann entervenan ti dir, ki demann pour plasman dan sa bann rezidans pe ogmante e sa pe met presyon lo sa 10 rezidans ek sant rezyonnal ki deza egziste.
Sa bann rezidans in fer sikse, me dapre Dr. David Payet ki MNA pour Glacis, sa sikse i sours bann problenm ozordi.
Onorab Souris ti rekonnet ki,malgre serten labi, i annan bokou bon keksoz ki’n arive, e i ti envit gouvernman pour azir ase vit lo bann sizesyon ki bann manm ti’n propoze.
