Minis pour Tourizm ek Kiltir, Alain St. Ange, in anonse ki son minister pe al etabli en komite kot bann manm ki lola pour azir koman bann ankadrer pour bann zenn diplome dan sekter tourizm. Sa komite ki pe al ganny met anplas pou enkli bann manedyer lotel, reprezantan Minister Lanplwa ek Devlopman Resours Imen, Bord Tourizm ek Lakademi Tourizm.
Minis St. Ange ti fer sa lanons dan Lasanble Nasyonal sa semenn ler i ti pe reponn kestyon Bernard Arnephy, ki Manm elekte pour distrik Anse Boileau. Onorab Arnephy ti anvi konnen ki plan ki’n trase pour bann zenn ki’n fini zot letid kot Shannon College, Irlann.
“Si okenn nou bann zenn diplome, ki’n retourn dan zot pei pour zot pran en karyer dan lendistri tourizm, i rankontre okenn problenm pandan zot travay, zot a kapab kontakte sa komite ki zot ankadrer, pour ed zot pour rezourd zot problenm e osi pour gid zot dan en fason ki pou ed zot reste dan sa karyer ki zot in swazir e dan sa karyer ki nou pei i bezwen ki zot reste ladan,? Minis St. Ange ti dir.
Sa i en linisyativ pour ganny langazman bann lotel pour asire ki sa bann zenn i ganny priyorite pour ganny plase dan bann pozisyon kle dan sa lendistri o fir e amezir zot ganny leksperyans neseser.
Laranzman ki Minister Tourizm ek Kiltir i annan avek bann manedyer lotel se ki, apre zot formasyon Shannon College, sa bann zenn i ganny atase 18 mwan avek bann gran lotel atraver Lerop, Dubai e osi Sesel. Set parmi sa trez etidyan ki’n termin zot letid an Mars sa lannen in deside retourn Sesel pour fer zot travay pratik e sis in reste aletranze.
“Lide par deryer sa legzersis,? Minis St. Ange ti dir, “se pour asir ki nou bann zenn diplome sorti Shannon College i ganny ekspoze avek leksperyans neseser pour ki zot vin pli eksperyanse pour zot antre dan lemonn travay dan nou lendistri tourizm.?
Miting in osi ganny fer avek bann sef lotel konsernen afin ki sa minister i diskite e ganny fourni avek plan formasyon, nouvo plan saler e lezot benefis ki sa bann zenn pou ganny ofer.
Minis St. Ange ti osi eksprim son swe ki evantyelman, sa bann zenn ava pran plas bann etranze dan bann pozisyon pli sinyor dan bann lotel e in pran sa langazman personnel pour swiv sa plan pour entegre bann zenn Seselwa dan bann lotel isi Sesel.
