The People Online

Anse Royale ti pou annan li de santener me malerezman enn in mor. Madanm Eugenie Sangol, par kont ti selebre son 100 enm laniverser Dimans le 26 Me, e zour fet dye, le 30 Me, i ti selebre son laniverser spesyal dan Sant Kominoter. Prezan ti Minis pour Devlopman Kominoter, Zafer Sosyal ek Spor, Msye Vincent Meriton, ki ti remet en ‘shield’ avek Madanm Sangol e felisit li pour sa zoli laniverser ki vreman pa nou tou ki sanse pour selebre. Dan sa pti rankont ki ti osi rasanble toultour sa madanm son bann koleg veteran e manm dan lasosiasyon Trwazyenm Az, ti osi enkli prezans MNA distrik, Onorab Derek Samson ki ti donn son pli vye zabitan en ‘hamper’.
Madanm Sangol ti annan trwa zanfan e i reste selman enn. E pour akonpanny son lazournen toulezour, se son ‘carer’ Fatima Killindo, ki ti dekrir sa madanm koman ankor for pour son laz. I ankor kapab pran son ben e fer son bann pti tripo limenm ki enkli rakomod son bann lenz. Savedir sa madann 100 an i ankor war kler byen, ki permet li kapab get televizyon parfwa san bezwen met linet.
Nou prezimen se sa ki nou konsider koman gro manze ki’n ed Madanm Sangol ariv 100 an etandonnen ki ziska prezan i ankor son pla prefere. Plito tar ki zanmen ‘The People’ i swet sa madanm ‘Bonn aniverser, e fotespere lannen prosenn nou vin donn li lanmen soufle ankor en labouzi”.