Ni Meyer Perdan Lider SNP Pa Vo!!!
I pa fasil pour tann dimoun, spesyalman dimoun aze fer en deklarasyon parey me sa pa zistwar, ni rakontaz me en fe. Telman dimoun in perdi konfyans dan Lider SNP e son bann politik konfizyon ki menm bonnfanm Titin, ki reste dan leo Baie Lazare, in fini fer son konklizyon ki sa boug pa ni vo okenn rekognesans dan listwar politik Sesel.
Sa remark ti pas Sanmdi le 18 Me. Bonnonm Totor parey son labitid ti’n desann Quatre Borne pour al aste konmisyon. E parey son labitid tou le semenn i ti’n pas laboutik e aste tou zournal ki ti’n sorti lafen lasemenn. Parey son labitid i ti’n aste en People, en Weekly e en Le Seychellois Hebdo.
Parey tou le Sanmdi apremidi in ti’n tal li dan son fotey e konmans lir son bann zournal ek en konsantrasyon profon. Menm ki i pa ti’n tro byen lekol dan son lepok zenes Ton Totor ti’n al fer laklas alfabetizasyon e tou le Sanmdi apremidi i ti lir bann zournal e pandan ki i ti lir i ti rakont son bonnfanm sa ki ti annan.
“Vreman pe annan en divan pozitiv sa semenn dan Le Seychellois” Ton Totor ti dir, “ pour en fwa Msye Ramkalawan pa’n maltret personn e omwen sa semenn in fer en propozisyon ki annan en pe lozik ladan. Mon zis demande akoz i pa fer sa en pe pli souvan olye tou le semenn trouv gravye dan lizye son prosen e bliye ki dan son de i annan mavwent madriye”.
Kwa ki in dir ki pour en fwa in fer ou tonm lo en konklizyon pozitif lo li Totor? Bonnfanm Titin ti demande. “I’n koz lo en sizesyon pour entrodwir en sistenm pour rekonnet bann dimoun ki fer bann keksoz ou zes remarkab ver pei e lasosyete an zeneral” Totor ti tradwir sa ki ti’n ekri lo paz 5 dan paz “Columnist”. “ Sa i en bon nide akoz i annan en bann nou sitwayen ki fer en bann zefor remarkab pour amelyor lavi sa pep, annou get Prezidan Rene, sa Msye in fer en kantite pour nou pep. Anou get nou menm Titin si Msye Rene pa ti’n konmans lalit an 1964, eski nou pti malere ozordi nou ti pou annan en pansyon, nou ti pou annan en lakaz ki apel pour nou, e plis ki sa, dan nou vye laz ozordi nou ti pou annan en morso later kot nou kapab asize ozordi e admir labe e detann nou?”
“Totor ase bet mon nwanr ase boufon. Kantmenm ou’n al lekol e kapab lir i pa trouve ki zis ou pe lir e ou pa kapab analiz rezon-det sa lartik Ramkalawan.” “Ki ou pe sey dir mwan ankor la Titin?” Totor ti demande. “Totor sa i senp sa boug apre ki in konbat pour vin Prezidan pei in finalman realize ki zanmen pep Seselwa pou donn li zot konfyans. Menm Msye Pierre in met li ater e la ozordi ni menm tit Lider Lopozisyon i napa, alors ki i pe sey fer se sey ouver en trou dan listwar pei pour sey rod en tit pour li. I tande ki Msye Mancham Larenn Langleter ti nonm li Sir James, li osi i pe rod enn pour met ek son non”.
“Be Titin ou konnen ou annan rezon. Mwan Totor tou sa rize ki mon rize mon pa’n kapab trouv sa zes. Nou tya’n kapab donn li tit pli gran perdan dan listwar eleksyon Prezidansyel e donn li en pti meday pounak.
Me ni sa i pa vo, sak fwa in perdi eleksyon nek in konplent ki laplenn pa ti nivo, napa leskiz ki i pa’n rode. Sel tit ki mon krwar nou kapab donn li se tit politisyen pli boufon ki Sesel zanmen in konnen”!!!
Bay I Zwenn Son Bay
Simon ti en pti nen. Malgre son pti grander, i ti en pti bonnonm byen kosto e pour fer li pli popiler, i ti en pti grannwanr byen dominer. Pa byen byen dimoun ki ti fer li per bonavini. Sitan i ti bay bann dimoun ki ti konn li malgre ki zot ti kontan provok kanmarad zot pa ti fye anmerd son lavi. Pour fer li pli move fon Simon ti annan en problenm begeye. Bokou fwa, spesyalman ki i ti ankoler dimoun pa ti konpran preski ditou ki i ti dir. Kan zot ti demann li pour repet sa ki i ti’n dir, la zafer ti vin pli sal ankor e bokou fwa se lager ki ti mele.
Menm son bann koleg travay pa ti fye li. Olye fer fars ek li zot ti forse reste a lekar ek li. Malgre ki son sef ti’n a plizyer fwa sey konsey Simon pour sanz son latitid, i pa ti fer okenn zefor, okontrer prezan ki i ti azir gro-bra.
Tou ti kontinyen koumsa pour bokou lannen ziska ki en bo zour i ti zwenn son bay. Sa apremidi Sanmdi Simon ti lo stasyon pe esper bis. Tou ti pe mars parey labitid pour li ziska ler en gro boug byen mifle e preski trwa fwa son grander ti apros li. “ke, ke, ke, kel er, i, i, i, e,e,e, ete?”
Simon kan ti get grander bougla, menm ki o premye moman i ti krwar ki bougla ti pe gognard li pa ti fye vir fer son bay. “ke, ke, ke, kel er, i, i, i, e,e,e, ete?” sa enkoni ti redemann li. Olye fer son dominer parey son labitid Simon ti forse kil dekote e al debout pli lyen.
En tantin ki ti’n temwanny sa lensidan, me ki par kont pa ti konnen ki Simon ti begeye, ti apros li ek lentansyon remontrans li. “Eski ou krwar i imen sa ki’n ou’n fer mon garson? Sa pov malere boug i demann ou kel-er i ete e olye ed li e dir li ler ou vir ou ledo e ou ale.” Titin ti anponny li.
“Ge,ge,gete, Tan,tan,tan,tantin, ou,ou,ou, ti, ti,ti, ou,ou.ou,oule,boug,boug,bougla, kas,kas,kas,kas tou,tou,tou tou mon, ko,ko,kot?” Simon ti reponn.
