Lavi, i kado pli presye ki Bondye in donn nou. I fer toud sort mister ki nou menm nou parfwa nou pa tro ganny en konpran. Nou tou nou konnen ki Bondye i donn lavi, i geri nou maladi e i osi pran sa lavi ki in donn nou.
Sanmdi pase dan sant kominoter Beau Vallon, bann madanm ki ti prezan, ti kapab aprann e konpran ki zot osi, zot kapab re-donn lavi e menm geri en pasyan ki son kondisyon lasante i dan en ka kritik, an donnan en lit disan, ki pa kout nou nanryen. Sa i prouve ki nou osi nou kapab fer mister e sov en lavi.
Prezan kot sa prezantasyon Sanmdi, ti Tyermenn Brans Beau Vallon, Mm Mirena Souris, ki ti’n anmenn son sipor pour komite madanm rezyon Nor, lasosyete Lakrwa Rouz Sesel, e Minister Lasante.
Reprezantan Minister Lasante, Mlle Linette Mussard ti baz son prezantasyon lo lenportans donn disan, e osi statistik lo kantite disan ki ganny servi dan bann ward dan lopital e osi benefis ki ou gannyen letan ou donn disan.
Reprezantan Lakrwa Rouz Sesel, ki osi en ‘blood donor’, e en ‘blood recruiter’ Msye Berard Julie, i ti dir ki i annan en mankman volonter isi Sesel pour donn disan. I ti fer resorti tre kler, ki Minister Lasante pa kapab fer vini disan, e ki disan i dan nou lavenn, e nou bezwen dimoun pour vin devan e fer sa zes volonter e ede pour sov lavi enn nou frer oubyen nou ser ki dan bezwen.
Apre prezantasyon en dizenn madanm ki ti santi zot angaze avek sa demann, ti donn zot non pour zot al fer zot tes Vandredi kot lopital pour gete si i posib pour zot kapab donn disan.
Sa kozri pou fer dan tou rezyon, e bann ki’n mank sa sans, pou annan en lot ki fer Sanmdi le 6 Zilyet, 2er apremidi, Maison Du Peuple.
