Home_Right determinen-banner2

Susbscribe to People

Msye Ferdinand Vidot, nou a rapel i erbalis pli popiler e bokou Seselwa e etranze i rod rekour kot li pour zot bann malez kot i ofer zot remed a la baz bann plant. I en erbalis ki renonmen dan lezot pei akoz bokou siyantis in vin kot li pour aprann e dekouver mervey gerizon atraver bann plant.

“Gastrik i en maladi ki vin dan lestoman apre transmet dan ledo. Parfwa i al dan tou bann zwen dan lekor, koman en gaz. Laplipar ditan gastrik i koze par manze ki nou manze e ler nou mank ler manze.
Ler gastrik i ariv dan ledo i vin en ilser, akoz gastrik i bokou. Sakfwa ou manze ou lestoman i brile, ou lekor i fay. Limenm li gastrik son latizann ou ganny mayok kri dou, si ou kapab toulezour ganny en pti bout mayok kri ou manze ek en pti trans koko sek. Ou mase byen avan ou avale, ou zet sa lamasi. Ou kapab manz sakenn pour li – pli bon manz koko ki pankor rape.
Apre sa, i annan bann plant ki ou kapab bwar son dite. I annan Zanbrovat, son fey ou bwi ou bwar koman delo lazournen. I fer sa divan sorti. Apre i annan Bazilik, ou bwi e bwar koman delo lazournen. I bon pour vant ek bann malad- tel ki gaz oubyen divan. Fey bwa Zoliker ou efize e bwar lazournen.
Letan mon fer en dite gastrik mon met Bwa Zoliker, Zanbrovat, apre Lanmant (ron) apre Bwa Koulev. Si ou gastrik i sitan for- pe fer ou lestoman fermal, ou bwar dite Rasin Zob. Ou pran Rasin Zob ou bwi e bwar koman en lafresisan lazournen. Li i ed depi dan bar vant parske sa divan i desann e li i fer sa divan sorti.
Bann manze ki ou pa devret manze ek gastrik se dipen, plito ou fer ‘toast’. Dipen blan i donn ou plis divan e tou keksoz ki annan lelven ladan parey makaroni, min eksetera i fer sa gastrik devlope. Bann bouyon, tel ki bouyon bred, bouyon blan i bon. Bann gro manze pa bon, eksepte mayok.

Menu