Home_Right

Susbscribe to People

Churchill Gill i aktyelman MNA Baie Ste Anne Praslin. I ti ganny elekte avek en tre gran mazorite pour Parti Lepep an 2016. Sa lannen zabitan sa distrik in donn li en lot gro responsabilite. Sa se pour vin tyermenn afen ki ya  diriz Parti Lepep ver en lot gran laviktwar dan prosen eleksyon.

Msye Gill  i en  profesyonnel dan domenn tourizm ek finans. I’n General Manager lotel Berjaya lo Praslin. Sa i lotel  ki apartenir a enn bann pli gran group dan Lazi.
Me sa ki pli enportan pour li se war lavi  zabitan son distrik amelyore avan tou lezot keksoz. Se pour sa rezon ki i ti met akote tou sa bann responsabilite profesyonnel pour li fer son kontribisyon dan politik.
Zournal “The People” ti koz ek li sa semenn pour konnen kimanyer i pe fer fas avek son nouvo responsabilite konman tyermenn Parti Lepep dan distrik Baie Ste Anne Praslin.

The People: Kimanyer latmosfer politik i ete dan ou distrik ?

Churchill Gill: Latmosfer politik dan distrik i kontinyen reste vibran an term diskisyon antre zabitan lo bann size e topik ki preokip zot e ki tous zot direkteman.

The People: Ki ou’n fer depi ler ou’n vin nouvo tyermenn ?

Churchill Gill: Ou konnen, travay ti’n deza konmanse depi menm avan mon vin nouvo tyermenn. I zis en kontiniasyon pour vwar ki pli bon fason pour travay e asire ki laspirasyon zabitan Baie Ste Anne i ganny akonpli.

The People: Mon asire ki ou’n zwenn bokou zabitan depi letan ou’n ganny elekte e menm avan sa, konman MNA, ki zot santiman lo Parti Lepep e lo konteks politik aktyel dan pei ?

Churchill Gill: Apre rezilta dernyen eleksyon in annan en pe konfizyon dan lespri bokou dimoun.  Me sa i normal akoz pour en bon pe letan nou pa’n zanmen vwar en tel rezilta.  
Me gradyelman siporter Parti Lepep pe konpran akoz ki gouvernman pe pran serten pozisyon ou serten desizyon.  Se egzakteman akoz konteks politik ozordi. Alor siporter pe konpran.

The People: Tou distrik i annan diferan problenm pou rezourd, apard zot bann lakonplisman, lo kote ou distrik, ki bann problenm irzan ki lanfaz i bezwen ganny mete lo la ?

Churchill Gill: Pour mon distrik, i annan pa mal problenm ki nou bezwen adrese e sa i konm swivan:

-Problenm drog pe fer bokou lefe negativ lo nou distrik.
-Problenm depans adisyonnel ki zabitan Praslin i bezwen fer fas avek pou al Mahe pour serten servis ki pa ofer lo Praslin. Zot bezwen tir sa larzan dan zot saler minimonm ki zabitan Mahe pa pe fer fas avek.
Problenm alokasyon “Housing Loan” ki zabitan Praslin pa pe kapab envestir antyerman akoz kou materyo i pli ser lo Praslin.

The People: Eski ou satisfe avek sipor ki ou pe gannyen pour rezourd sa bann problenm e menm fer sa travay konman tyermenn ?

Churchill Gill: Wi! I annan bokou keksoz ki pe ganny fer avek serten sipor me parey ou konnen,  ozordi i annan dimoun ki bezwen fer de travay pour kapab amelyor zot sityasyon e onor zot konmitman.  Alor, sa dan limenm i fer ki ou pa pou neseserman ganny lakantite dimoun pour tou bann rankont.
 
The People: Ki kalite partisipasyon ki lazenes Parti Lepep pe fer dan devlopman ou distrik ?

Churchill Gill: Nou bezwen koz tre fran ozordi.  Partisipasyon lazenes dan bann distrik i diferan konpare avek lontan.
E sa i annan plizyer rezon akoz.  Preokipasyon lazenes ek zot priyorite in konpletman sanze.  Sa i en fe e nou bezwen konpran sa.

The People: Eski ou satisfe  avek zot nivo e kalite partisipasyon ?

Churchill Gill: Baze lo mon larepons avan, i vedir ki zot partisipasyon i definitivman  pa sa ki mon ti a swete vwar. Se mwan alor ki pou bezwen adapte mwan avek zot nouvo fason fer olye ekspekte zot fer parey mwan mon anvi.

The People: Eski lazenes Parti Lepep dan ou distrik, zot enterese dan politik parti e pei oubyen zot pa enterese ?

Churchill Gill: Lazenes zot enterese avek politik parti, me pa espekte ou pou vwar zot dan tou fonksyon parti zisteman akoz zot osi zot annan zot progranm personnel.
 
The People: Konman en endividi e en politisyen, ki bann kalite ki ou annan pour fer sikse konman tyermenn Parti Lepep ou distrik ?

Churchill Gill: Lapros e platform politik ozordi in konpletman sanze, alor ou bezwen annan bokou plis inovasyon  dan ou fason fer pour ou kapab aport rezilta.
Ou bezwen kapab fer siporter parti konpran ki ozordi tou keksoz i bezwen annan latransparans, rann kont et bon gouvernans,  alor nou siporter i bezwen konpran sa.  Mon senserman krwar dan sa prensip alor mon bezwen fer sir ki tou nou siporter i konpran sa e pran sa tre serye.  
Sa ya ed zot pour konpran travay zot MNA e tyermenn lafason ki zot pe delivre.
Alor an gro, se bann kalite tel ki travay drwat, fer sa ki posib, kapasite pour adres keksoz, agrandi prosperite mon distrik e lager pour ki defi ki distrik per fer fas avek i ganny adrese dan en dele letan akseptab.

The People: Nou konnen ki ou distrik in touzour vot Parti Lepep, eski ou krwar ki sa tandans pou kontinyen e akoz ?

Churchill Gill: Tandans pou kontiyen akoz parey mon’n dir pli boner, siporter pe gradyelman konpran ki pe pase e zot ganny eksplike  kot zot pa konpran.  Apre sa, zot santi zot konfortab pour kontinyen siport Parti Lepep.

The People: Letan ki bann prosen eleksyon i ganny fer dan pei, eski ou krwar ki Parti Lepep pou ankor ennfwa sorti konman sa parti politik pli for ?

Churchill Gill: Nou bezwen pran kont ki platform politik in sanze dan Sesel e sa i  en realite. Me sa pa vedir ki nou parti pa kakap repran son mazorite dan Lasanble Nasyonal. Mwan mon konvenki ki Parti Lepep pou kontinyen domin lasenn politik Sesel.  Me i pou bezwen annan bokou travay ki ganny fer dan parti  lo tou nivo.

Menu