Home_Right

Susbscribe to People

I annan bokou zenn ki kontan travay Sesel.  Pa fer sa fot pour krwar ki tou zenn i dan drog oubyen ki zot napa  vizyon!

Sa i senpleman  en kalite konversasyon  ki serten politisyen i oule fer nou krwar ladan.  Si nou les zot fer nou krwar ki nou lazenes in fini, se dan sa fason ki zot krwar ki zot pou ganny pouvwar politik.  Me laverite se ki i ankor annan bokou  zenn ki diferan.  Zot stil lavi i fer nou konpran ki nou merit annan ankor bokou lespwar dan lazenes Seselwa.
Kenny Hokan i aze 37 an e i pe reste dan distrik Mont Buxton. I travay kot PUC konman en “Meter Reader”. Setadir tou le zour i leve byen bomaten pour li pas kot lakour dimoun e anrezistre ki kantite elektrisite oubyen delo ki zot in servi.
Sa i en louvraz ki tre konplike. I annan letan kot ou kapab ganny abize e menm ensilte avek dimoun ki pa kontan sa “bill” ki ou donn zot apre ki ou’n lir zot “Meter”. Me kontan oubyen pa kontan, i bezwen annan dimoun ki fer sa louvraz.
Me apard sa, Kenny i en zenn ki osi enterese dan sa ki pe pase dan politik son pei. I ekout tou sa ki pe pase dan gouvernman e menm andeor gouvernman.
I osi ekout tou sa ki pase dan Lasanble Nasyonal e menm andeor Lasanble Nasyonal. Se pour sa rezon ki i ti kapab partaz sa bann lopinyon swivan  avek nou zournal. Son bann lopinyon i reflekte sa ki bokou lezot zenn i osi kwar ladan ozordi.

The People: Konman en zenn, kimanyer ou  war sitiasyon politik an zeneral Sesel?

Kenny Hokan: Politik i en pe enteresan. I annan keksoz ki Parti Lepep i kapab fer pli byen ki sa. Lasanble Nasyonal pa pe “perform” parey dimoun ti pe ekspekte pour fer pei mars pli byen.

The People: Akoz ki ou siport Parti Lepep e non pa en lot parti politik ?

Kenny Hokan: Parti Lepep mon vwar en vizyon avek li e son vizyon i pli kler ki pour tou lezot parti politik. Akoz ki mon dir sa ?
 Letan ou gete, 40 an pase letan ki pei  ti  pe konmans anvoy son lipye pour bouze, Msye France Albert René konman  dirizan sa lepok  ti met keksoz o kler. Par egzanp, atraver bann proze konblaz, son vizyon  ti pou 40 an apre.
Letan serten politisyen ti pe “boycott” konblaz,  li i ti konnen ki i ti pe fer. Ozordi nou vwar son bann rezilta ki i pe anmennen. Se lo sa menm konblaz ki bokou lakaz pe ganny fer pour Lepep Seselwa.
Se osi lo sa menm konblaz ki tou biznesmenn Seselwa pe rod en plas pour fer zot biznes.

The People: Kwa ki ou krwar i bon avek Parti Lepep e kwa ki ou krwar i merit ganny aranze ?

Kenny Hokan: Sertennman letan mon get  Parti  Lepep, pa tou keksoz ki dan  dimyel ek diber.  I annan keksoz ki zot kapab aranze. Par egzanp: Pri Lavi. Saler pour travayer. Nou parti i bezwen fouye e gete ki i kapab fer anplis pour sa pep.

The People: Eski ou krwar ki Parti Lepep i popiler parmi bann zenn ?

Kenny Hokan: Mon vwar li ase popiler akoz bann zenn deor, menm bann ki dan drog zot pe dir ou se gras a Parti Lepep ki i annan dimoun ki pe eseye retir zot dan sa problenm.

The People: Ki ou lopinyon lo Prezidan Danny Faure ?

Kenny Hokan: Danny Faure i definitivman meyer dimoun pour diriz  pei pandan sa letan. Parey mon ti pe dir ou pli boner, ansyen Prezidan Albert René ti annan son vizyon pour son letan. I’n fer son bout. Prezidan Michel ki’n vin apre li, in osi fer son bout.
Me la i letan Prezidan Danny Faure.

The People: Ki ou lopinyon lo Lasanble Nasyonal ?

Kenny Hokan: Lasanble Nasyonal pa pe marse e les mwa eksplike. Zot pa pe get dimoun ki vivan la ozordi. Zot pe get dimoun ki’n fini mor. Zot pe travay pour le mor. Kestyon ki mon demande se: Ki zot pou fer pour dimoun ki la ozordi ?
Zot pe travay pour lanmor e avek rankin. Se sa ki mon pe vwar ozordi. I annan en kantite problenm dan pei me zot pa pe koz lo la.

The People: Kimanyer ou ti a kontan vwar sa pei a lavenir ?

Kenny Hokan: Mon ti a kontan vwar li retourn parey i ti ete avan kot sa parti politik ki ansarz gouvernman i osi ansarz Lasanble Nasyonal. Se koumsa ki en parti politik i kapab enplimant son vizyon byen.

The People: Eski ou krwar ki i annan en lot parti politik ki kapab diriz Sesel apard Parti Lepep ?

Kenny Hokan: Mwan fransman mon pa pe vwar lezot parti politik. Koman en zenn mon krwar ki Parti Lepep i merit sa enn ki gannyen dan eleksyon pour diriz pei.
Letan mon pe get LDS, zot pe travay zis pour rankin. Mon pa pe vwar nanryen ki zot pe fer pour re-aranz pei.

The People: Kimanyer ou war lavenir politik Sesel apre sa 2 prosen eleksyon ?

Kenny Hokan: Seselwa i merit desann e donn Parti Lepep sa  vot  ki i merite. LDS pe travay zis lo lanmor e ou pa pe vwar sa striktir e nide ki zot pe vin avek pour avans pei pli devan.
Alor mon krwar ki se sa ki Seselwa pour dir atraver zot vot.

Menu